"بعد عندك أمل بـ لبنان؟"

العنوان هو أهمّ سؤال سألني اياه محمد مكّي بعد "انضمامي" الى ال "Lebanese Panda Revolution" .  و للصراحة، هيدا الموضوع هو أهمّ من المواضيع السابقة متل الصحة و البيئة و الاقتصاد، لأنّ بلا أمل، مش لح يكون في عنّا دافع لنحسّن بلدنا. آخر اكتشافاتي موضوع كتبه اللبناني ايلي فارس و عنوان مقاله

 "The Week I Lost Hope In Lebanon" و لقد كتب هذه الجملة:

 “Can we nag? Sure. Would that lead anywhere? No. Can we talk about it? Sure. Would that get us anywhere? No. Can we do something about it? Perhaps. Would that change things? No.”

هيك جمل و هيك اعترافات بتصيب الناس يللي عندهم أمل بالجلطة. كتير عالم نصحوني و قالولي "خيّي ما حا يطلع بإيدك تغيّر بلد" مع العلم إنّو كل واحد منهم بدّو لبنان يتغيّر. أكيد كل واحد منّا بحبّ يكون عندو كهرباء 7\24 و ما يضلّ عايش بخوف من انفجارات و كل قرف السياسة.  كلنا منتمنّى ترجع بيروت باريش الشرق و يرجع لبنان سويسرا الشرق فعلاً مش بس بالحكي.

ايلي لخّصلنا حالة كلّ لبناني: بيحكي بالموضوع بس مش طالع بـ ايدو. منبقا راكضين ورا هؤلاء السياسيين و "نحنا فدى السيد" و "الله و الشيخ" و "على راسي البيك" على أمل انّو "بوظّفلي ابني" أو "بيدعمنا بالأوقات الحرجة". بالمقابل، كل شي بقولو هذا السياسي يللي عم بعاملنا متل خواريفه كأنّه قرأن أو انجيل منزّل علينا. الكل بقلّك "اذا منّك مدعوم بلبنان فتت بالحيط". بس المضحك انّو حتى لو عبدنا السياسي أمرار ما بقدّملنا شي.

الى متى بدنا نضلّ عايشين بجميلة السياسيين؟ طيّب مزال نحنا معظمنا ضدّ هيدا المنطق، ليش ما منحكي و منقول "نحنا غير راضيين عن هذا الوضع" ؟أنا انسان راشد و حرّ بقراراتي. صحيح يمكن لوحدي ما بيطلع بـ ايدي ، بس أنا مش لوحدي. أنا مأكّد انّو في عدد منيح من اللبنايين غير راضيين عن ها الموضوع. كل واحد ما بيحَر أخبار كل يوم غير راضي عن هيدا الموضوع. كل واحد بيحضر فيلم أو برنامج كوميدي أو فنّي بدل برنامج حوار سياسي غير راضي عن هيدا الموضوع. كل واحد بعد عندو أمل بلبنان غير راضي عن هيدا الموضوع.

حرام لبنان يخسر الأمل يللي كان عند ايلي.

حرام لبنان بشارة الخوري و رياض الصلح يموت معهم.

حرام لبنان بنهار 22 تشرين الثاني يضلّ مفقود الأمل منّو.

الانتخابات النيابية قريبة، و صار لازم نشكّل شريحة من الشباب غير راضية عن الوضع الحالي. نحنا ما فينا نغيّر بـ لبنان إلّا اذا انتخبنا لبنانيين يهمّن مستقبل البلد مش انّو يستفيدو من الكرسي كمنجم مصاري أو قوّة لمصالحهم الشخصيّة. لازم يتذكّر النائب المنتخب مين وصّلوا الى منصبه. نحنا شباب جامعات و عنّا اطّلاع على العالم الخارجي أكثر من يللي أكبر منّا: نحنا قادرين نغيّر و ما في شي مستحيل.

بدنا نعيش ببلد منفتخر فيه، مش على أرض منضلنا منسبّ الساعة يللي خلقنا عليها بسبب فقداننا الأمل.

 Written by Omar Fleifel :our twitter follower that believes in a true Lebanon as much as we do